خلاص ماشية؟
وسايبانى مع الذكرى
أداوى البعد بالحرمان؟
وسايبانى فى ليل قاسى ما بيعديش
وجرح كبير ما برحمنيش
وعمر بيجرى مايهديش
وقلبى مش معابا كمان !
*
*
خلاص ماشية؟
وبتقولى انى مش فارس
ولا قبطان؟
ومش قادر أعدى بمركبة حبى
فى وسط بحور من الأحزان؟
ومش قادر
أطير فوق الحصان الأبيض
وأهد السجن والسجان؟
وأخطف بسمتك منهم
واسيب كل الدموع بينهم
ولو كان يرفض السلطان؟
أنا شاعر ما ليش أساطير
ولا عنديش حصان بيطير
فقولى زى ما تقولى
ولا يهمك
وصبى فى الوريد همك
هتلقى القلب
رغم الجرح
وسط الزحمة بيضمك
*
*
خلاص ماشية؟
ما تنسيش تاخدى وياكى الصور والشعر
وبصى بس فى الصورة
هتلقى القلب عاش فيها
عشان خاطرك
رسم كل الحياة فيها
كسر كل السدود فيها
بنى الدنيا اللى كان مستنى طول عمره
ف عيونك بس يبنيها
ولما حس بالحلم اللى عاش جواه
كسرتيه لما خدتيها
*
*
خلاص ماشية؟
باعتلك ويا أحلام البشر ... بوسة
باعتلك ويا طير الحب
فوق غصن الشجر... بوسة
باعتلك ويا نور الشمس 100 بوسة
ودقة قلب
بقولك فيها .... لسه باحب
ولو كان بعدى عنك صعب .... هيعدى
ما عدى ف حبى مليون صعب
سفينتى تايهة فى بحورك
وبتدور على المرسى
ونور القلب من نورك
ومهما تغيبى............ مش هانسى
